Gratis kvalitetsdataspel

I’ve got some balls

Oppdatering 2009-07-08

Denne nettstaden er no offisielt lagt ned, eller i det minste lagt i koma. Eg vil ikkje komma med nokon nye omtalar framover. Dei gode nyheitene er at eg lèt alle dei gamle spelomtalane ligga oppe, og eg har sjekka og retta alle lenkjene, slik at det ikkje skal vera noko problem å lasta ned alle spela. Les gjerne òg historien bak Gratis kvalitetsdataspel, og send meg ein e-post om det er noko du lurer på.

Introduksjon og anna pjatt

Eit av mine største favorittspel er SpinDizzy. Dette spelet kom ut i 1986 på ei 8-bits maskin, Amstrad CPC. (Det kom ut på fleire ulike maskiner, men det var Amstrad eg hadde.) Sjølv kom eg ikkje over spelet før eg leitte rundt etter gamle Amstrad-spel for bruk i emulatorar i eit FTP-arkiv. Då eg fann spelet og begynte å spela det, var eg hekta. Det var rett og slett utrulig gøy. Etter fleire veker klarte eg endelig heile spelet (eg hadde rett nok fuskemodus med uendelig tid påslått).

Kva gjekk so SpinDizzy ut på, lurer du kanskje? Vel, du skulle styra ei kule gjennom veldig mange brett, og plukka opp diamantar som var spreidde utover. Spelet var «litt» 3D – ein såg brettet på skrått ovanfrå (det var forresten først etter eg var ferdig med nesten halve spelet, at eg oppdaga at ein kunne bytta vinklar (fire forskjellige)!).

Dette spelet

Vel, tilbake til dette spelet. Grunnen til at eg nemnte SpinDizzy, er at dette spelet minna meg mykje om det. Òg her styrer du ei kule gjennom fleire brett, og må samla diamantar.

Ved stor fart kan du spretta over hindringar på bretta. Og om du går gjennom nokre portar, får du ulike eigenskapar (kan hoppa høgare, få større fart &c.). Dette er nødvendig for å kunna gjennomføra dei ulike bretta. Spelet har ingen tidsgrenser, men du skal prøva å fullføra dei ulike bretta på kortast mulig tid. Rekorden blir lagra, og eit «opptak» kan spelast av når du vil. Meir om dette seinare.

Grafikk og musikk

Dette spelet er sjølvsagt mykje nyare enn SpinDizzy, og har mykje betre og meir avansert grafikk – det er «ekte» 3D. Du bør faktisk ha eit 3D-grafikkort for å kunne spela dette spelet. Det går utan, men du må velja veldig lav skjermoppløysing for at det skal vera spelbart. Spelet går jamt på mi maskin, men dette er sjølvsagt avhengig av grafikkortet – mitt er ikkje serlig bra.

Musikken er òg kjempegod, og spelet har i tillegg ein del flotte lydeffektar.

Konklusjon

Dette spelet er eit av mine favorittspel, saman med SpinDizzy. Prøv det!

Ein liten konkurranse

Som nemnt, blir opptak av rekordane lagra, og kan spelast av seinare. Derfor tenkte eg me kunne ha ein liten konkurranse. Her tar eg med ei oversikt over dei beste rekordane for kvart brett. Nokre av bretta finn du på den tyske sida eg har lenkja til.

Du kan lasta ned rekordfilene for å stadfesta at det ikkje er noko fusk inni bildet. (Plasser dei «maps»-katalogen til spelet. Du kan so sjå opptaket ved å å velja «Top Scores» frå hovudmenyen.)

Viss du klarer å slå desse rekordane, kan du senda rekordfilene til meg, og eg vil legga dei ut her, saman med namnet ditt (eller berre initialane, om du føretrekker det).

Dato	Brettnamn	Tid	Initialar	Fullt namn
2003-07-12	Killer	47,47	VAB	Kjell-Bjarne Torgersen
2003-07-12	Jump	44,77	VAB	Kjell-Bjarne Torgersen
2003-07-12	Castle	70,16	VAB	Kjell-Bjarne Torgersen
2003-07-12	Loops	24,14	VAB	Kjell-Bjarne Torgersen
2003-07-12	Trapped	39,65	VAB	Kjell-Bjarne Torgersen
2003-07-12	Chinawall	28,04	CHA	Chavez
2003-07-12	Minigolf	40,79	CHA	Chavez
2003-07-12	Racetrack	39,28	CHA	Chavez
2003-07-12	Rotation	133,62	CHA	Chavez
2003-07-12	Teatime	19,36	CHA	Chavez
2003-07-12	Ollin	5,30	ZHA	?
2003-07-12	Huge	104,02	BOR	Borre Mosch
2003-07-12	Moving Objects	95,88	BOR	Borre Mosch
2003-07-12	Tiny	18,03	BOR	Borre Mosch
2003-04-06	Lazer Maze	27,47	CHA	Chavez
2002-04-06	Chase	7,96	CHA	Chavez
2003-04-06	Disco	21,43	CHA	Chavez
2002-04-06	Rollercoaster	16,04	CHA	Chavez
2003-04-06	City	19,72	CHA	Chavez
2002-04-06	Cannon	25,60	CHA	Chavez
2003-04-06	Castlecoaster	25,13	CHA	Chavez
2003-03-11	Nightmare	92,18	VAB	Kjell-Bjarne Torgersen
2003-02-03	Bounce	44,58	VAB	Kjell-Bjarne Torgersen