Gratis kvalitetsdataspel

Oppdatering 2009-07-08

Denne nettstaden er no offisielt lagt ned, eller i det minste lagt i koma. Eg vil ikkje komma med nokon nye omtalar framover. Dei gode nyheitene er at eg lèt alle dei gamle spelomtalane ligga oppe, og eg har sjekka og retta alle lenkjene, slik at det ikkje skal vera noko problem å lasta ned alle spela. Les gjerne òg historien bak Gratis kvalitetsdataspel, og send meg ein e-post om det er noko du lurer på.

OBS! Dette er ein betaversjon av eit spel. Det vil seia at det ikkje er ferdig, og vil sannsynligvis innehelda feil, kanskje alvorlige feil. Kanskje vil det fungera OK, kanskje ikke. Verken eg eller spelprodusenten kan garantera noko.

Introduksjon

Dette er ein nyversjon av Burger Time, eit gammalt spel. Både grafikk og musikk er sterkt forbetra.

Poenget i spelet er å laga hamburgarar (derav namnet!). Dette er litt komplisert, då ingrediensane er spreidde rundt på brettet (som dekker meir enn skjermen). Kvar hamburgar er sett saman av fire ting: brød, burgar, salat og brød (på toppen). Desse er plassert over kvarandre – på ulike plattformer – og fell ned om du går over dei (storleiken på burgarane er uforholdsmessig stor i forhold til kokken! ☺). Det er ingrediensar til fire hamburgarar på kvart brett.

Stigar

For å gå rundt på brettet er det plassert ein god del stigar du kan klatra i. Dessverre er det òg plassert ein god del annan (levande!) overdimensjonert gatekjøkkenmat, på jakt etter ein liten kokk å hemna seg på. Om du har livet kjært (du har forresten tre liv) bør du unngå desse, eventuelt skubba hamburgaringrediensar på dei.

Tre brett

Det er berre tre brett i denne versjonen (pluss eit hemmelig). I tillegg er det nokre opplæringsbrett. Vel, det trengst eigentlig ikkje fleire, då eg berre har komen til det andre brettet. Spelet er nemlig veldig vanskelig. Når det er sagt, må eg òg nemna at det er veldig bra og gøy.

Grafikk, lyd og konklusjon

Grafikken er fargerik og flott, og musikken er stilig. Sidan det er ein betaversjon er det nokre småfeil her og der, men ingenting alvorlig. Dette er eit veldig bra plattformspel.

Bilde

 

Spel­informasjon

Versjon

Beta 0.9

Forfattar

Craig Rothwell

Heimesida

Burger TimeWARP!

Kort beskriving

Ein nyversjon av det eldgamle spelet Burger Time, med sterkt forbetra grafikk, lyd og spelbarheit.

Burger TimeWARP! vart først omtalt 1999-10-18.

Gratis kvalitetsdataspel-nettstaden er skriven og utforma av Karl Ove Hufthammer. Eg set alltid pris på kommentarar, kritikk og tips.